Zlatko Tišljar
 |
Zlatko Tišljar naskiĝis en 1945 en Zagrebo, Kroatujo, kaj
esperantiĝis en 1962 en Studenta Esperanto-klubo de Zagrebo. Li gvidis pli ol
100 Esperanto-kursojn. Prezidanto de Jugoslavia Junulara Esperantista Asocio de 1968 ĝis 1977 kaj membro de la komitato de TEJO. En 1972 li iniciatis kaj fondis entreprenon Internacia Kultura Servo en Zagrebo, kiun li direktoris ĝis 1991. IKS evoluis al entrepreno kun 10 enpostenigitoj kun signifa eldona agado, kun ĉiujara profesia Pupteatra Internacia Festivalo (PIF), kun organizado de sciencaj simpozioj, teatraj festivaloj, seminarioj. Ĝi evoluigis ankaŭ la Zagreban Metodon instrui Esperanton, kies lernolibro aperis jam en 32 lingvoj. Li estis membro de UEA-komitato de 1979 ĝis 1998. Ekde 1992 li loĝas en Maribor (Slovenio), kie li fondis entreprenon Inter-kulturo, kiu interalie organizis SAT-kongreson, REFon, Alp-adrian konferencon, sciencajn simpoziojn, prelegseriojn, festivalojn (2 Pupteatrajn festivalojn en Klagenfurt kaj iniciatis la festivalon La Strada en Graz en kiu li organizis ankaŭ internacian simpozion «Internacia familio – utopio aŭ realeco» en 1994) kaj eldonis pli ol 30 librojn. |
| Li iniciatis fondon de Asocio por Eŭropa Konscio en 1996
kies sekretario li estas ankoraŭ nun. Ekde 2001 li laboras en Popoluniversitato
de Maribor kaj okupiĝas pri eŭropaj projektoj en edukado kaj ekde 2009 li estas
emerita. En 2000 li fondis Societon por Eŭropa Konscio en Zagrebo.
Ekde 2005 li estas sekretario de Eŭropa Esperanto-Unio. Li estis ankaŭ
prezidanto de organiza komitato de la 7a EEU-kongreso 2007 en
Maribor. Li tradukis kelkajn romanojn kaj novelarojn el la kroata kaj slovena literaturoj al Esperanto. Li studis ĉe la Filozofia Fakultato en Zagrebo ĝeneralan lingvistikon kaj germanan lingvon kaj poste ĉe AIS kibernetikan pedagogion (li magistriĝis per diplomlaboro pri propedeŭtika valoro de Esperanto). Li verkis plurajn sciencajn verkojn pri lingvistiko kaj pedagogio. Liaj ĉefaj originalaj verkoj estas »Eŭropa ideologio«, «Esperanto vivos malgraŭ la esperantistoj», «Duobla spiralo» kaj «Eŭropo, vi baldaŭ mortos». Li verkis ankaŭ lernolibrojn (ĉefaŭtoris la bazan lernolibron laŭ la Zagreba Metodo), verkis Instrukciaron por uzantoj de tiu metodo, B-lernolibron kaj du vortarojn (esperanto-kroatan kaj esperanto-slovenan). Li multe vojaĝis kaj prelegis pri esperantaj kaj eŭropaj temoj. Li partoprenis en pli ol dek projektoj financitaj de Eŭropa Unio, inter kiuj la Lingvan Festivalon li mem planis kaj gvidis. La Festivalo gajnis aron da eŭropaj premioj. |
|
Seminario B Lingvaj rajtoj en la Eŭropa multkultura socio Dimanĉo la 22a, 14h30 - komuna prezento Lundo la 23a, 09h00-12h00 Mardo la 24a, 09h00-12h00 Ĵaŭdo la 26a, 09h00-12h00 kaj 16h00-19h00 Vendredo la 27a, 09h00-12h00 kaj 16h00-19h00 (resumo alvenos) |
Festparolado Kadre de la Oficiala Inaŭguro Dimanĉo la 22a, je la 10h00 Malcentrismo en kultura kaj lingva politiko. La baza principo de politika
funkciado en EU estas principo de malcentrismo ("subsidiareco"). Mallonge dirite temas pri
principo kontraŭa al centrismo. La fonto de suvereneco estas je malsupra nivelo,
ne en la centro. La decidrajton havas unue la malsupra nivelo � do regiono. La
regionoj decidas pri ĉio mem krom pri kampoj kiujn ili mem decidis fordoni al
pli supra nivelo (la ŝtato). Sammaniere la ŝtatoj intertraktas pri parto de
suvereneco, kiun ili transdonos al la pli supra nivelo (EU) kaj sub kiuj
kondiĉoj. |
